KA MUALPHO PUI TAWH A, A TAWP KA THLENPUI NGEI TUR A NI

                                                                                                                        Mama Hmar

  Hna hmanhmawh a awm avangin office ka thlen ve leh ka hna chu ka thawk nghal mawlh mawlh a, chutiang khawpa ka in concentrate avang chuan ka phone ri pawh chu ka lo hre lo hial a. Hna hmanhmawh tihah hna tam a nih lem loh avangin ka zo ta thuai a, ka phone ka han en a, missed call lo awm chu ka call back nghal a.  Ka mi hriatsa a nih avangin uang thuang chunga han biak nghal mai ka han tum a, mahse, nidanga a aw ka hriat ang kha a ni ta tlat lo, thinrim leh lungngai aw ri a inpawlh nuk a ni ber mai, “Thianpa, ka rilru hi chu a na ve khawp mai, kei min duh lo a nih paw’n hetiang thil hi chu an tih ka lo ring lo hrim hrim” tia thinrim thaw hlawp hlawp chu ka thianpa aw ngei a ni. Ka thu hriat chuan min thawng hle mai a, office kawtah chuan min lo nghak reng hi a lo ni a. “Chuti khawpa thu liantham chu eng thil nge ni ta ang” tia ka inngaihtuah chhung chuan kan office kawt chu ka lo thleng ta der a. A motor, tawng ve lam tawh ngheng chuan a lo ding kun lap mai a, han en reng reng chuan a lungawilohna chuan a hneh hle a ni tih a hriat mai a. Thil awm dan chu kan sawi dun nghal bawrh bawrh a, kan inzilh leh thin bawk a. Tih lehzel dan turte kan sawi hnu chuan hma a lak dan tur chu a sawi ta a, mahse, chutianga anga hma a lak chu tha ka tih pui loh em avangin thulhtir ka tum tlat a, ka thianpa lah rilru sak ve bawk, a duh dan chu puitlin a tum ruh ve hle bawk a, “Hetiang hian ti mahse ka nei tur hi a ni ringawt, ka mualpho pui tawh a, a tawp ka thlen pui ngei tur a ni” tih thu chu a sawi hnuhnun ber a ni, a motor chu ti nung vut vutin a tlanliam ta a. “Thianpa, a pawi tehzawng a nih hi, bul i tan dan dik se chuan…” tiin lainat tak chungin ka thlir zui vawng vawng a.

  Nulaten ‘a hmel a tha’ an tih chuan an daw duai ang, ‘a hmel tha lo mah se a fresh tal a lawm’ an ti a nih pawhin dawt an la sawi cheu a niang. Mahse, ‘a palian thova’ an tih erawh chuan an sawi dik thung ang. Ni e, hmel leh vunah chhuan tur nei lo mahse, hmeichhe tam tak duhthu samin palian tak erawh a ni hlauhva. Chutiang khawpa hmel leh tisa lama chhuan em em tur nei hran lo mahse mak tak a ni mak tak tak. Sapin ‘charms’ an tih, Mizovin ‘chuai’ kan tih ang hi a nei nge ni, chhass lah chu a nei thei phian lawi a, hmeichhe bula awm dan a hre tehzek a niang chu! A thiamna phu tawkin sawrkar office pakhatah hna a thawk ve a, nu boral san tawh ni mahse, a pa enkawlna hnuaiah chuan tudang an ngai bik lo. An chhungkaw dinhmun sang lua lo mahse, a rilru erawh a dah hniam duh bik thak lova, a tum tihlawhtling tur chuan a rilru a tikhauh thin hle a ni. Chutiang mi a nih avang chuan chhass pawh a nei chhe ngai lem lova. Tuna a chhass pawh hi ‘he nu hi chu awwwww…’ han tih vawng vawng theih tur chi hi a ni nghe nghe. A ti a nungin a hmel lah a tha, mi tupawh hi nelawm takin a be thei zel maite chuan mite ngainat a hlawhtir reng a ni, a neitu tan chuan a ngaihawm duh khawp ang le . A ni lah taka, tul thilah thiante chhass chu kan hmuh ve fo a ngaih bawk si avangin a lan dan, hmelhmang leh a miziate chu kan hai bik tlat lo reng a.

  A tawi zawngin, ka thiana chu a chhass nen chuan an in duhin an inhmangaih a, an in lawm a, an in ngai a, an pahniha inkarah chuan hmangaihna tuipui hi a fawnin a fawn hlup hlup a ni ber mai. Hetia hlim taka an awm mek lai hian chhungkua atanga induhlohna chu a inmung chho tan ve mek bawk a, chhuanlam tling tak tak pawh a ni mahna. Chung chhungkaw pahnih inkarah chuan chu hmangaihna chu a puitling thei meuh ang em? Ka thiante chuan tuma pawh then theih loh tur ni awma mawi chu an chelh reng thei ang em?

A hmeichhia hi phaia college zir lai a ni a; zirlai mai a nih avangin pasal neih chu sawi loh ngaihzawng chungchangah pawh a nu leh pate chu an la ‘strict’ thak thak hle. Ni e, an fanu naupang ber a ni a, a lo zir puitlin hnu pawha hna tha eng eng emaw la thawk ve tura an beisei a ni. Pasal a neih pawhin a mah a zahpuiawm loh avang pawhin mipa zahpuiawm loh tak la nei thei ve ngei tura an ngaih a ni. Chung beiseina sang tak an beisei lai chuan an fanu duati chuan bialpa satliah mai ni lo, ‘hmangaih bur’ a lo nei reng a ni tih erawh an hre hauh si lo. Mahse, chhungkaw khat na na na, hriat reng loh thu awm suh, an fanu, beiseina sang tak nena an lo thlir chuan bialpa a nei a ni tih an hriat chuan le, meiling an hmuam hi a ni ringawt. Zilh mai chu sawi loh, hauh a tawk ta nghal a, chu mai chu duhtawk lovin kutthlak hial a tawk ta. Engvang maw? Chu a hmangaiha dinhmunah chuan a hmeichhe chhungte chuan beisei tur an hmu lo a ni mahna.

  Mite chu tlangnel takin an bialnute inah an leng thin, chaw hialte pawh an ei thin, chaw ei chu sawi loh len tak ngial pawh chak hle mahse ka thiana tan chuan a har ngang a ni e. A chhass rawn haw ve chang pawhin hmun remchang dang an insiam thin ta ringawt mai a ni. Ni e, an pahnih inkarah chuan neuh neuh chu a tam alawm, sawichhiat leh an khum an tawk dun deuh reng bawk a. Chuti khawpa a fapa duhlotute chu a ngai thei ta bik thak lo mai, ka thiana pa chu a sa ve ta phat a, an chhungkaw zahawm nan a tuang a tihchhah a ngai ve tlat. Duhlotu leh deuhsawhtu laka tlawm reng mai chu patlinga pumpa tan chuan a tlawmthlak reng lah taka.

  ‘Love is blind’ kan tih fo hian awmze hrang hrang a nei thei awm e. A bialnu/bialpa tlinlohna haider a, an inhmangaihna chauh thlir chunga an awm dun khan ‘hmangaihna mitdel’ tiin an sawi thin. Tin, an inhmangaihna a lo pung telh telh a, Kohhranin a phuar dan tur leh a nghawng dan turte thlir nachang hre tawh lo khawpa hmangaihnain a bualat avanga a taka an hmangaihna an tihlan khan hmangaihna mitdel ti pawn a sawi ve theih tho awm e. Ni e, nula leh tlangval inngaizawng lem lo, awm dun satliah ngawt pawh a boruakin a zir chuan ‘tih mai’ a nih fo thin hi. Chung ngaihtuah chuan hmangaihte inkarah phei chuan a awm hliah hliah zawk lo maw? A awm kan tih avang chuan a tha tihna erawh a ni hauh si lo, tha lo mahse, dinhmunin a zir miau loh avangin, nge a zir vang kan ti zawk dawn? hun remchang an hmuh khat tehreng nen, remchang an hmuh chhun erawh an hmang am deuh a ni ang e,  an insumna chu a insum reng thei ta bik lova, Kohhran huang an lo daidar ta hial a.

  An thil tih rah chu a lo lang ta thuai a, chu chuan an pahnih inkar chu a siamthat theih mai an ring a, beiseina pawh an nei sang hle. “Thianpa, ka rilru hi chu a na ve khawp mai. Kei min duh lo a nih paw’n hetiang thil hi chu an tih ka lo ring lo hrim hrim” tih thu ka phone atanga ka hriat chuan chu an beiseina chu beisei chi a ni ta lo tih ka hrethiam ve ta nghal mai a. Ni e, kha kan office kawta kan sawi dun lai khan, ‘an rilru pawh a nem ve thei tawh ang’ tia a lo innghah vena chu a kehchhiat zawh tak vek thu a sawi mawlh mawlh a. Mahse, “Hetiang hian ti mahse ka nei tur hi a ni ringawt, ka mualpho pui tawh a, a tawp ka thlen pui ngei tur a ni” tiin mi rilru sak, a hmangaih neih ngei tum tlatmi chuan kawng dang a dap leh ta kha a ni a.

  An hmangaihna thil tihin rah a chhuah tawh chuan boruak chu tha tura ngaih a ni, mahse, that a hnekin ‘a zual zapui vaihlenhlo’ an tih angin, chu an thil tih chuan thinrimna, nunrawnna leh pawisawina a rawn hring chhuak ta zawk a. An fanu in nau a pai tih an hriat chuan lawm namenin an lawm ta lova, tihtlaktir an tum ta, an hlawhtling ta reng bawk a. Phaiah sum tam tak sengin zirna in tha leh changkangah an dah kha a ni a, lehkha thiam thei tak a la ni zui nen, a hma hun chu a eng nangiang e. Mahse, an la dawn phak ngai reng reng loh, a chhe ber chu an fanu chungah chuan a thleng ta thut si a.

 Krismas tuk (26th December) a ni a, kan Kohhranah hian thalai hi fatu tura ruat an ni thin a, hemi ni pawh hian ka fatu ve avangin mahni tawkah ka buai ve hle a, ka thianpa erawh hi chu rokhawlhna a neih avangin a fatu ve ta lova, ruai theh hun thleng pawh chuan kan in hmu ta miah lova, a tukah pawh chuan kan la inhmu ta chuang lo. Thu thang ka hre ta tlat mai, a tih atana ka duh pui loh tak thil chu ka thianpa chuan a ti ta. Engvanga kha mi nia bo hlen ta nge a nih tih chu ka hrethiam ta chiah a, nupui a lo ru chu niin. Rilru sak, a tum hlawhtlin ngei ngeitir duh mi chuan a ruahmanna dang chu a tihlawhtling leh ta chu a ni phawt a, a dinchan pui ngut ang emaw chu? 

 Thawhleh zan a ni a, kan kawngkhar chu tu emaw hian a rawn kik ri karh karh a, lo lut tura ka tih hnu chuan a rawn lut ta a. Ka lo en reng a, a hmel a hlim, a nun a hlim, a thla a muang tih chu ka zawh kher a ngai lo, a awm dan chuan a puang chhuak vek mai. Chutah “Thla thar tir lamah…” an ti nghal tawng mai a. Chhei le, a hlawhtling ta, a va ropui em! Ka hnukte pawh a tiulh dawn dawn ka ti. A hmangaihna chu a sualchhuak ta, a lawm chiah kan hmabak ta.

  Dan khatna tlin ta lo mahse, a tan chuan inneihna ropui ber a ni a, mi ropui leh challang, thil tha tak tak mite hriatah ti lem lo mahse hmangaihna a hnehna chu a ropui em em thung si. Sum leh pai uma hmangaihna tellova inneiten ropui eltianga an lawm thinte chu an awt hek lo, mi zawng zawngin lawmpui lo pawh nise an ni pahnih chu an lawm tawh tho tho. A nupuia chhungte ngei ina an han fakte kha a va ropui em, “An inhmangaihna kawng hi a bumboh ve hle a, hetianga nupa an lo ni thei ta mai pawh hi ani (ka thianpa) sualchhuah liau liau hi a ni, a fakawm hle” tih chu kalkhawm mipuiten an hre vek asin. A sualchhuah danah thil felhlel tak tak awm bawk mahse, hmangaihna erawh a sualchhuak thung si.

TUIPUI RAL RAM NULA NEN

                                                                                                                Rinmawia Hnamte

Nipui khawlum huam huam kar ah ka chuanna rel  tlu tlu tluk tluk tlu tlu tluk tluk  ti rawh pawh chu horn ri ruai ruai ri chuan a ti zawi telh telh a, station lian lemlo tak ah chuan ‘chawlh ka mamawh e’ ti ni awm tak in a ding hmuk a. Keini pawh chuan chhuk zai chu ka rel ve ta a.Station bul mai ah chuan bus var chuan min lo nghak reng tawh mai a, kan han in thiar luh fel chuan kawngpui zau tak mai ah chuan kan kalna tur pan chuan kan tlan tan leh ta par par a.

            Kumtina kan lo tih thin dan in kan college a North East zirlai te chuan kan senior kal chhuak tur te pual in farewell program kan nei leh dawn a, chumi kan neihna tur lam Varkala Beach pan chuan kan kal mek ani. He beach hi lian tak lo nimahse, hnamdang ten south India lam ah chuan an tlawh ber ani nghe nghe a. Hemi tum hian kan thian dang te chu incharge an ni a, keini erawh chuan a sum thawh lam chiah kan tum thung a. Mizo keimah chiah ka awm a, mi dang ho hi Naga leh Arunachal deuh vek anni a, kan zavai hian mi sawmnga bawr vel chu kan ni ngei ang le. Kan kalna tur hmun kan thlen chuan Hotel thlenna tur lam chu kan pan ding ta nghal a. Vanduaithlak tak nge lawmawm zawk kei leh ka thianpa chu kan leng ve ta tlat lo mai a, sum atam bawk a hotel hran ah thleng tur chuan min ti a, kan thlenna tur a bul lawk ah chuan kan in nghat ve ta nghal a. Tlai lam anih tawh avang in kan in dah fel hnu chuan tui cheng tur chuan kan chhuak ve nghal a..chaw te kan ei kham chuan kan thian te awmna hotel chungzawl ah chuan kan programme urhsun leh ngaihpawihmawh ber hun chu kan hmang a. Hemi hun ah hian infuihna te, lawmthu sawi nate, thilpek na ten hun kan hmang a. Chutia hun kan hman zawh chuan party te nau neih tur ani a. Kei lah pek chu lam ngaina ta lo fam chu ka thianpa be rawn in kan room lam ah ka chhoh tur thu ka hrilh a.

            Chutia kan room lam pan a ka kal chu mikhual dang chi hrang hrang avar adum anlo tam ve phian mai alo ni a. kan in bual fai mut kan tum chu muhil thei ta reng reng lo, inchung lama kan chho chu thutna nuam tak mai lo awm a. Thiante hun hmang pawh chu alo hmuh thei reng mai a. Ka room ah let thla leh in ka mp4 player leh ka thian tha ber mai ka guitar pawm  chuan inchung lam ah chuan ka thu ta a. Mahni tawk ah lung hi aleng ve thei khawp mai. Earphone a hla ngaithla pah a guitar perh in ka zai ve a,kan chawlh lai chuan ka hnung lam ah kut beng ri ka hria a. Kan hawi let meuh chuan Tuipui ral ram nula chu alo awm reng tawh chu niin kan hmu thut chu ka hamhaih khawp mai. A sam chu a buang nalh hle a. Kawr bah pan tak mai ha in jeans pawnfen chhing tawk tak feng in chapal simple deuh mai hi a bun a, kei lah pek chuan biakna chang  hre ta hek lo. Amah zawk chuan I zai thiam hle mai a te min han ti a, lawm tur nge min bawl pawh ka hre tawh bik lo. Ka bula thutna awl chu kan pawt hnai a ka bula thu tur chuan kan sawm ve rawih a, ani pawh chuan ka sawmna te pawmin alo thu  ve mai a. Tichuan sap tawng bah deuh nek nuk chuan a chanchin te chu kan zawt hmasa nel nual a, Ilonka niin Holland lam atanga a u mipa te inneih  thar hlim Honeymoon hmang rual in alo chho ve chu ani a, India ram hmun hrang hranga an kal tawh hnu in, kan in tawnna hmun chu an kal tawpna tur ni tawh in a hnu lawk ah chuan an ram ah haw tawh tur anni a. Ka chanchin kan sawi ve a, India  mi ka ni tih ka hrilh chu mak a ti ve tho mai, khawchhak lam pang mi ni  tur ah min lo ngai ngei ni tur ani, chutia Zoram lam chanchinte kan sawi lai mek chuan Beer in ve leh ve loh te min han zawt a, ka in theih thu ka hrilh chuan min hrethiam lawk tiin a kal ta daih a. A hnu lawk ah rawn let leh in Basket te rawn khaiin India ram chanchin ziahna bu chu a rawn zakzeh chho tat mai a. Chu Tourist Guide bu chu an en ngun tawh hle tih hriat tak hian a kawm vel te chu a hniar sung mai a. Mahse Mizoram awmna hmun kan keu thlen chuan alo la thar bal thung a, chutah ka ngaihtuahna a lo lang thut ah chuan ramdang mi te tan hian kan ram hian larna chhan tur hi a nei lo em ani tih kha a ni a. Mizoram awmna te an ziah bak ah thiam ang tawk chuan kan silh a, lo kal lo tur ani bawk nen kan sawi nuam khawp mai a, lokal te pawh a chak hmel khawp mai. Tichuan a Basket hawn atang chuan Beer ka la hmuh ngai reng reng loh han en mai Skol beer ai chuan atui ang tih a kawm atang pawh a hriat theih tur hi rawn hum chhuak. Hnial tum hek suh i, a tam bawk a inlam kan tan ta a. Kan ti ti chho zel a, kan in pawh zel bawk a. Kei lah chuan an ram inkhel thiam ka hriat ang ang hming te kan sawi chho a, Lu a lo hai chho tan nen kan in hnaih sawt hle mai, ho te te sawi pawn anui ta nghek nghek a, a chang leh min lo chum ti tih a, ka kai tan deuh hlek tawha, ka hmu nalh tulh tulh leh nghal a, mumang ram te pawh a ang hial in ka hria. Kan ti ti rei thawkhat aniang, kan thiante pawh chu an lo bang tawh a,tichuan chhuk thlak zai kan rel ta a, a kal hlei theilo chu kuah angai hial a.A room awmna lam ah chuan ka hruai phei a, A u te room nen chuan alo in thenawm chiaha, kawngka te kan han lut a. A basket khai te chu kan dah that sak hnu chuan, atuk a inhmuh leh tur a tiin chhuahsan mai kan tum a, chutah ka ban ah min chelh chuan chanlohkhana malsawmna kan ti dawn nge amah zawk chuan mi rawn fawp ta mai a, mak ka ti a, in rin ngaihna pawh ka hre lo, mahse kan in ngaituah harh a, kei pawh chuan duhthaw tak chuan ka lo chhanglet ve a, a room chu ka chhuahsan thei ta hram a.

            Ka tlenpui pa chuan min sawih harh a, lu hi ana rum rum a, tuiin ahal deuh huam huam bawk a, kan in phihfai zawh chuan ka thianpa chuan Breakfast tur min lak kep tawh thu leh nizan a ka awmna chu min zawt chhunzawm nghal zat a, ka thianpa Arunachal pa nen hian roommate kan nih avang in thu zep tit tet hi kan nei ngai lem lo a. Kei pawh chuan ka hun hman dan kan hrilh chuan keimah aiin a phur thar tih mai tur in hmuh ve aduh thu a sawi ta cheng a. Breakfast te kan ei zawh chuan thian te beach awmna lam pan chuan kan chhuak phei ve ta nghal a. Tiaupho ah chuan an lo awm teuh tawh a, a tar azur in an lo mu thluah hlawm a, a then te phei chu movie vela kan hmuh ang deuh in an lo mu kengkung bawk a, chutia kan kal lai mek chuan min ko thawm ka hria kan hawi chu, kan sir atang chuan ka thian-i chu a tui chen thuam a pawimawh chin khuh zo pha tawk hian kan lam panin alo kal mek hi alo ni a, ka thian chu kan kheuh zeuh a ni pawh chuan a hrethiam ve nghal mai a, kan bul alo thlen chuan kei in ti zei ta pek chuan nizan aiin ka hmu nalhin I hmeltha zawk daih mai kan lo tih khalha, ani pawh chuan sawi tur a hamhaih phah ve hle aniang, a ang zuaia thank you tih chiah a sawi a, anui ringawt a. A u te awmna lam kan kal pah chuan nizan kha I thin arim ang tih ka hlau lutuka ka ngaituah let leh in a ti a, kei lah pek chuan thinrim lo e, ka chak leh tawh zawk lutuk alawm ka lo tih san mai a, ka thianpa pawh chu a lo nui ve ringawt a. Tichuan inhmel hriat tawnna te kan neih hnu in in hmuh leh tiam in kan in kalsan  a. Kan thiante awmna lam chu kan va pawh phei ta a. Lunch te kan han ei zawh chuan zan lam a kan hun hman hnunhnung ber tur hmang turin tih tur te an  sem kual a. ka thianpa lah pek chuan a hrilh theih ang zawng zawng chu a hrilh tih mai tur ani a, min chhaih tan ta hlawma. Ka tih tur a an ruat pawh chu ti lo in I thiannu chu va kawm la ,kan lo awl ang che anga mahse zan hun hman na lam ah chuan ilo hruai ngei ngei angai ang an ti thung a. Aw pawh tih loh theih loh in min siam a kei pawh chuan ka kalsan ta hlawm a.Chumi tlai chuan Tuifinrait kam ah chuan kan pahnih chuan kan leng dun ta a. state changkang ve tak in a ramdang khualzinte hipna tur hmun atana an tih a ni bawk a  ahmun te pawh chu a nuam in  mahni ram a awm ve atan a it awm hle ani.

           
 Zan kan hun hman hun alo thlen chuan ka thiante hnena ka lo intiam tawh avang in, ka thian-i pawh chu kan hotel atang chuan ka hruaichhuak ve ta ngei a, Programme te kan hmang chho tan a hun ruatsa kan hman zawh chuan Request programe an siam a, ahmasa ber atan tuber nge mawni chuan ni, ka thiannu nen chuan zai tur chuan min ti ta tlat mai, chutah ani pawh chu a zak ve ngei aniang a hawi chhuak tha ngam meuh lo. Guitar chu kan hum ven vawn a, hlasak tur a vang khawp mai. Ka thianpa chuan As long as you Love me tih kha rawn thlang leh pek tlat a, thian dang te ho lah an phur tawh nen, ti chuan kan pahnih chuan kan sa ta a, ani pawh chu rin ai tak chuan alo zai thiam khawp mai a,

I dont care who you are

Where youre from

What you did

As long as you love me

Who you are

Where youre from

Dont care what you did

As long as you love me

Every little thing that you have said and done

Feels like its deep within me

Doesnt really matter if youre on the run

It seems like were meant to be            

            tih lai vel phei kha chu,hmangaihna ram ah cheng lo mah ila sak chu nuam ve khawp mai. Programme chu a hit chho zel a, thiante thenkhat pawh chu an in chhaih tawh hlawm a, ka thiannu nen chuan in bekbawr in Hotel lam pan chuan kan chho dun ta a. A tuk kha kan haw hun a nih leh tawh mai si, keini lah kan in nel chho mek ni bawk si, am thiam taka hun hman chu ka tum ran a, dan ngaiin intur lam te kan in dun leh a, zirna lam te eng eng emaw kan sawi hnu chuan room lam ah kan in sawn thla a. A khum ah chuan insi rial in kan thu duna. A chang in kan in fawp leh vawng vawng zel a. Ka room a chhuksan chu ka tum zinga, tawngkam tha in min chelh ziah a, kei chuan ka tum lui duh lo bawk a. Zan a rei tak em avang chuan chhuk tum tak tak in kan in siam tana, mahse amah zawk chuan riak ve maila ,naktuk in haw hma in ka kaitho ang che a ti ta mauh mai. Awi karei tih mai rum rum a chak awm khawp mai, han hnial dawn khan pa lo ka ni ang tih kha ka hlau ve tho bawk si, ka hreh deuh rual rual in chakawm bawk si. A tawp ah chuan inthiamlo tak leh chak tak chung chuan tuipui ral ram nula tawih kiang ah chuan ka mu ve ta a.

         

   A tuk ah kan haw kawng ah lah chuan thiante chuan min fiam chhen mai a, mahse kan mu dun tih erawh ka thianpa lo chuan an hre chuang lo. A hnu kar tawp dawn ah chuan a hnen atang in mail ka dawnga, Karleh an haw hun anih tawh dawn avangin weekend hmanga lo phei tur in leh a sum sen ngai zawng zawng pawh aman atum tur thu min lo thawn a. A sawmna ang chuan a hun ruat ah chuan Rel station ah chuan min lo hmuak a, Taxi in kan hotel hman thiam lam chu kan pan ta a. A seat hnung ah chuan kan thu dun a, driver hmuh leh hmuh loh pawh kan dawn lo, kan nui, kan hlim a, kan in fawp bawk a. Hotel thlen chuan a mawihnai ah Room te chu ka han book ve na a, A tan tirh room service in min hruai luh bak kha ka lut leh ta lo. A roomah chuan ka in nghat tawp a. A u te pawh chuan tha tak in min be ve mai bawk a. Ni hnih leh zan thum chu mipa te duhthusam chuan hun kan hmang dun a, Khawi hmun hmun emaw ah chhun ah kan kal a, zan ah kan room hman thiam ah kan kir leh a, ei leh in lam lah duhthusam a tui in a mân a buai ngai lo in kan lam a, Damlai pialral kan chen hi ani ringawt mai. Class kal lai ka nih avang in ka haw san leh ta a.

          

  Thlawhna a haw tur an nih avang in kan awmna chu rel in an chhuahsan angai a, an haw ni alo thlen chuan kei pawh chuan ka hmuh hnuhnun ber tur a ngaiin kan khaw rel station ah chuan ka lo nghak ve a. Vai ho an phu suau suau a chu ti lai kar ah chuan kei chu ngawireng in ka thu a, hun kal tawh a kan hun hman te kan ngaituah kir neuh neuh a. Ka awmdan leh ka hun hman dan chu kei ngei pawn ka in thiam thei lo khawp a, a hun laiin nuam chu ti viau mah ila min kap tu hi a awm tlat mai a. Chutia ka in ngaituah muk lai chuan rel pawh chu alo thleng tan a, a rawn kiu ri ruai ruai tawh a, ka awmhmun te in siam rem in a rawn chuanna compartment lam chu ka pan a, ka thian I pawh chu a rawn in thuam nalh leh ngei mai,kawngka ah chuan lo dinga alo hawi kual nasa mai a. A bul ka va thlen chuan kan han in chibai a ,a seat awm na lam ah chuan kan lut phei a, A u te pawh chu an lo thu ve bawk a, AC a chuang annih avang chuan mi anlo la tlem khawp a. A piah deuh tuma la awm lohna lai ah chuan ah chuan kan in sawn phei a. Duhthaw tak in inhmu  tawh lo tur kan ni tih in hre reng chung chuan chu hun tawi te chu kan hmang a, tawngna hun a awmloa duhthaw leh thlahlel taka in kuah vawng vawng mai loh kha chu .Rel tlan tur chu ari leh ta ruai ruai a, tichuan basket te present min pe a ka chhuksan a, rel chu atawlh chak tulh tulh a, ani pawh alang te tulh tulh a, ti chuan an lan tawp thleng chuan ka thlir a, ani pawh chuan a ban a rawn vai ve lauh lauh bawk a. Vaiho ka bula awm ve ho chuan ka hau hian min lo en ve a, ka awmna lam chu Auto rickshaw chuan ka haw phei leh ta a. Room kan lut a ka thian pa chuan lo nui  vur vur chung chuan mei nei tak chuan min lo fiam nghal pang a. A thil min present te chu kan hawng a, amah nena kan beer in dun thin ang ngei mai chu a awm a, kan thlalak dun te chu alo printout a lo dah teuh bawk a. Han enmai chuan a khawhar thlak angreng hle mai, ka hmangaih ti dawn ila ani thei bawk si lo, thenkhat chuan ‘Love at first sight’ te pawh ani an ti hial mahna mahse kei chuan ka pawm thei chuang lo, mahse zep lo chuan ka ngaina in ka rilru chhungril chu a luah ve khawp mai.

        

    Ni aliama, hun aliam zel a, thla alo ni der mai. Internet lam atang ten kan la in be chhunzawm ve zeuh zeuh thin a, kum chanve dawn hnu chuan a reh vang vanga, alak atangin engmah chanchin hriatna ka nei lo a, kei lah in ka bepawp hlei thei bawk si lo, tichuan,hun enge maw chen hnu chuan a hnen atang in email ka dawnga ngaizawng   tawn thar thu leh tun ah phei chuan an chen dun thu thleng in a rawn sawi ta bawk a, a chin min rawn hrilh tur leh be tur a hun fian rial a neih loh tu te rawn sawiin, ama hman hun tur remchang sawiin hun a rawn tiama, chumi hun ah chuan kan in kawm dawn nia ati a. A hun alo thleng a,kei pawh chu phur fahran lo chuan laptop hma ah chuan ka thu ran a, a rawn online  ta ngei a, a chanchin eng eng emaw a rawn sawi a,min ngaih zia thu te, a rilru leh ngaituahna ka luah zia thu te min rawn hrilh ve nasa, hnamdang mize dang ramdang kan nih na chuan mi athliar hranglo thei si lo, chu kan pahnih inkar a eng a mah hma a harsatna awm chu a haibik loa, chuvang chuan ani pawn mi dang chu a nei ta a. Dem theih ani lo a, huat theih pawh ani lo ,in biak tawh lo te kan han rawt a, ti chuan kan hun hnuhnung ber tur atan kan in mangtha ta a. Kum aral hnu chuan rinloh tak in alak atang in mail ka dawng a, tah chuan a kawplai nen chuan an inneih thu alo ni a, thlalak te pawh arawn thawn tel a mahse en pawh ka en lo, lawmpuina ka thawn a chumi rual chuan keipawh chuan ka delete ve ta nghal a.

          

  Khang kan hun hman te kha kum tih tham aral leh ta, rilru ah chuan thi lo mahse inchhir chang ka ngah khawp mai, mi ke pen ruala pen a, khawvel indona kar a tel ve thei tura inbuatsaih tur in chhungten hmun hran ah min awmtir a, ti chung chuan kei lah chuan Pathian huat zawng chu sawi loh, chhungte an hriat atan pawh a zahpui awm khawp in ka lo awm chu ani si a. Bai dai baw harh an tih ang deuh in anih tur anih zawh tawh hnu ah ka inchhir leh a, mahse khua ala tlai lo e, hmalam huna tan chuan Mizo ka ni a ka Mizo pui ngei ka kawp tawh anga, chutih rual in Pathian huat zawng leh mawilo zawng in ka awmpui tawh lo ang tiin ka in siam fel ta a..

           

CALL BOY KALO NI RENG MAI.

                                                                                                              Immanuel-a

 Tunlai thiamna te hian mihring nun alo thunun nasa hle mai. A chhanchu, chhungkaw pakhatah hian mobile phone nei vek ang in chhut ila, chhungkaw member tin in nei hi 100 ah 75% vel ni ta se, computer hi chhungtin ah deuh thaw a awm tawh bawk a. 100 ah 90% ang velin chhut ta bawk ila. Kan inchhung chu electronics in a khat țep a ni. Computer graphic sang tak tak te nen game kan khel a, internet kan pawt deih fur bawk anga. Online game, site hrang hrang a luh kual leh online shopping nan kan hmang deuh ber awm e. Mahni mobile phone ațang pawhin a tih theih vek tawh bawk a. Engkim mai hi tunlaiah chuan a awlsamin thil tih zung zung duh mi kan nihna nen hian a inhmeh hle in ka hria.

 Zirna bei tura hmun dang ațanga Aizawl khawpui a awm ve țantirh kha chuan Airtel company leh BSNL chiah ala awm a, mobile nei phei chu Aizawl khawppuiah pawh an la tlem khawp mai. Kal thui vak tawhlo ila, kan ram țhan chhoh dan chu kan hmu thiam vek awm e. Zirna sangzawk bei a, thiamna sang zawk bei turin chhungte chuan min duh a, chu mi tih puitlin chu ka tih makmawh a ni tlat si. Ka theihna leh ka thiamna te Lalpa i tan chauh ka hmang anga, i ram zauh nan ka thiamna leh finna te ka hmang ang tih chu ka thupui a ni ve khawp mai. Kan khua ka chhuahsan dawn chuan min hmangaihtu, engkim min ngaihtuahtu, a fnina pawh ka chelh rualloh ka nu chuan ti hian thu min chah a, "khawi hmunah pawh awmla, khawi khuaah pawh awm mahla, thil pahnih i theihnghilh ngai loh tur chu heihi a ni; Kohhran i thlahthlam tur a nilo, Presbyterian kohhran ah PATHIAN RAWNGBAWLTU ka nihna hi zui ve kher a ngai ka ti pawh a nilo, mahse Min Zahsak angai a, i nu min hmangaihna i hriatreng tur a ni. I awmna hmunah Kohhran i bel tur a ni, i belh phawt chuan nuam iti anga, i ta a ni nghal mai, kan kohhran kher a awmlo anih pawhin kohhran lian berah i lawi dawn nia, mahse kan kohhran hi thlahthlam loh tur, kha kohhranah khan in hnimphum emaw inpek kher angailo, nang chu Presbyterian Pachal leh ruhkawl, a thling ngat ni reng turin ka chah duh che a ni. A dawtleh ah chuan YMA hi i thlahthlam tur a nilo, mi tamtak chuan Kohhrana inhman a, YMA a inhman bawk hi an duhlo, mahse, hmanlaiah chuan a hunah kan YMA a, a hunah kan KTP leh mai țhin. Nangpawn YMA hi i chhiat țhatah an tuamhlawm dawn che a, chumaibakah, YMA hi i rawngbawlna tur pakhat a ni. Engtikah mah lo thlahthlam lo la, a chhungah i tel phawt chuan nuam iti reng anga, i awmna Veng/khua chu nuam iti zel ang" tia min hrilh kauh kauh te hriatchhuah hi chuan tunah hian enge ka dinhmun le?

 Hun alo kal zel a, ka theih ang tawkin lehkha chu kan zir ve a. Nun hi nuam ti chi, thaw veng em em ni silo, harh em em ni silo, a thawveng mawi tawk, țhianten ti ang u aw an tih chu ti ve thei mai zel, picnic pawn nuam ti ber pawl, khawi ilo chhuah vah pawh a nuam ti ber ber, an nuih ham ham tawhna ah chuan ka hming hnaisailo hi a ri tel ve fo mai. chutiang a nih mek lai chuan Zirlai Pawl a inhman ve tehi a țha lawmni te kan ti ve a, ka zuang lut ve. Mahse, ka rin ang alo nilo hle mai. Politic khelh zirna alo ni reng mai. Ka khel ve thiamlo hle, mahse țhiante zarah College khat SU chu kalo ni ve reng mai. Ka dinhmun ka thlir let a, hetiang lai mai han nithei chu kan chhuang ru hle a, chutih rualin insitna a na duh hle. College kal turin thawmhnaw țha mumal ka neilo, chutihlai tak chuan college T-shirt kan nei hlauh avan tihchi tak em! Nitin ha mah ila, a balh loh chuan college ah a mawi ber tho. SU te ka nih ve avang chuan SU T-SHIRT nen ka inhakchhawk zak zak țhin. Țhiante zarah neinung fa chet a chet angai ber mai chu a hahthlak țhin hle. Mahni nihna lanchhuahpui ka ngamlo kha ka inchhir țhin hle. Mahse alo nilo, canteenah țhianten min treat rawh an tih pawh khan neilo ka ni bik ziah, ka neilo miau a, kum tawp lamah phei chuan tuman min treat rawh an ti ngai tawhlova, bus fare tur neih loh changa haw rualpui tur ka nei lehzel te kha ka tan chuan Lei Vanram alo ni ngei mai.

 Thawhchhuah neih ve thuai thuai chu ka chak a, ka nu min fuihna kha hrerengin ka hunte ka hmang țhin, ka theih ang tawk tawk in. Mahse chutianga nun hman reng a, sum mamawhna a san zel avang chuan ka nu thawhchhuahsa rin ringawt chu theih loh chin te alo thleng dawn a ni, chutih hunah chuan engtin nge ka tih anga, ei engtin nge ka zawn ang tih chu zanah minti mutheilo tu leh khawvar min thlenpuitu ngaihtuahna alo ni reng mai. Han ngaihtuah a fel maithei nise chuan ka ngaihtuah chhuak ngeiin ka ring. Mahse, a theih si loh. Mite tihdan te ka zir a, ka theih loh tur thil hlirin a khat ni hian ka hre leh lawisi. Mihring nun hi chu alo mak mange. Chhurburan Nahaia chu nise alo mai tur tia chengkek a khawih rengte kha minti hrechhuak rum rum mai. Mihring fapa hi alo va dawihzep theih vele! Mahse, duhthlan tur awm heklo le. Ka hma ah enge lothleng dawn a engthil țha nge lo thleng dawn tih hre lemlo chuan ka tum lam chu ka her danglam ta. Zirna dang ka zawhsan ta daih mai le! Min hrechiang tuten mak an ti hle awm e. Keimah pawh hian mak ka inti hle nghe nghe.

 Chu zirna chu alo dangdaiin a sum hrawm lah chu a na hrep lehnghal a, ka beidawng dawn rum rum țhin. Mahse, miten an zir theih chu ka zir ve thei ang tih ngaihtuahna nen ka țang ve sauh sauh a, dinhmun laihawl tak ațangin a passed ve mai a. Thil pangangai alo la ni zel mai. Ka nunah hian inchhut reng reng hian hun ka hmang mai dawn a nih hi hna awm tur bera ka ngaih lah chu a ho ve fu roh bawk si a ler han thlen meuh chua. Mahse hetiang zawng hian kalo thlir ngailo. A ler ațanga bul țan leh tur kan ni tih hi. Zirna sang ber an tihte zingah chuan ka tel ve a, mahse a sang ber ațang chuan hna thawh mai tur a lo awm talo. Khawvel hi beidawnna khata hmutute hmuh ang chu ka hmu chho ve feih feih ta mai. Nun beidawnga intihlum ta mai te pawh hi ka dem lem talo. An dinhmunah ding ve nia ka inhriat vang a ni.

 Ka mawngah ek a chhuah theih nan tih takmeuh a ka beih alo ngai a, ka zirlai kha chu kawng min kawhhmuhtu leh a hmanrua ah pawh perek ang vel chauh alo ni. Hna zawng reng reng a rilru sen chu alo hahthlak zawk. Chhungte pawisa dil a inthlahrunawm tawh si. Inthlahrung reng rengin hun kan hmang leh lawisi. College kal lai vel a rilru thawveng em em a kan tal țhinlaite kha ka ngai rum rum țhin. Hnathawhtur chuan minlo hmuak ve ngei ta mai, kan ti ve dawn a, ka hna tur ber kha michhungkaw inkara tlakzeh ngaichi alo ni leh si... aw hringnun rapthlak zia hi! Ka beidawng chhuahsan ta tawp. Ka tan a țhatur engmah a awmlo anih hi ka tihlai chuan leh chutianga hun ka hman mek laichuan hmeichhe pakhat hian amah rawn insawichawpin hna ka hmuhsak che a, i thawhduh chuan kalo sawi ange a ti a, thawk ve tur chuan ka inbuatsaih a, chutiang hna chu ka ralkhat hriatruk țhin anih avang chuan thawh ka chak ve tak ani a, ka huphurh bawk si. Mahse, ka rin ai daihin alo nuam a, sum pawh ka mamawh ka nei ve thei ta zel mai. Ka nun a hlim a, ka nun pawhin changkanna lam a pan ta zel mai a ka hna leh hlawh hmuhna chu nuam ti takin ka thawk a, miten engtianga sum hmu nge ka ni an ih pawhin zak miah lovin ka chhang țhin. Miten alo ni maw tia min fak tawk lah bolo, țhenkhat chuan i tlin hle mai min ti bawk a. Keimahah chuan lawmna hi a khat miau si a, mi min deusawhna chu insiamțhat nan hmang zel pahin chu hna chhete ka thawhna atan chuan ațangkai zawk a hman chu ka tum țhin.

 Chu hna chu miten ka thawk a ni tih engtin nge anlo hriat pawh ka hrelo. PATHIAN malsawmna a ni miau si a. Ka phone number te an lo nei a, Pathian in keimah hmangin mite rilru hahdam takin a siam ni ber hian ka hre țhin. Zan rei tak tak a chhuah angai a, phone bill pawh a hek duh hle țhin. Mut mu tuah hman meuh loh chang lah a tam mai. Mahse, nuam kati a, ka hlim a, Pathian min dahna ani tia ka pawm tlat avangin ka nun hahthlak tak chuan țhat lam a pan a, ka thau zawk a, mite mak tih khawpin kalo thau a, officer dulkiar ang kha ka nei ve ngei. Ka duhvang a nilo a, ka hna hlim taka ka thawh vang zawkin hriselna Lalpan min pe alo ni zawk a, che ve tak kha mi hmaah chuan alo zahawm lova, midang han dawr nikhua ah pawh thau deuh na na na chu tlemin kan thusawi miten an lo awih zawk. Tih țhianten anlo sawi țhin chu a tak tak lo nih dawn hi, te ka ti rilru mai mai țhin. Tupawh mahni hna ah rinawm tak thawk a, kan hna chu a sang emaw a sanglo emaw nuam ti taka thawh a, Lalpa ropui nan zel a hman hian kan hlim alo ni mai țhin.

 Chu i hna chungchangah miten zawhfiah duh an nei anih a, thil hriat loh an zawh duh che a an lo phone che a nih chuan țha taka lo chhan hi a pawimawh a ni, pi leh puten țawngkam țhain Sial aman anlo tih kha a dik hle mai. Miten an harsatna min share an lo phone che chuan i țawngkam avang khan mi an dam thei a ni tih hriat hi a pawimawh hle mai. Chutiang tur chuan Phone biak hawihhawm tak hi a pawimawh hle a, kan țhianpa chuan zana inzuar țhinte deal țhintu chuan an mahni dawr turte țawngkam mawi ber leh a țha thei ang berin an be țhin, hmelțha leh chhia ah an thliar lo sum an hmuhna tur a ni tih an chiang, a tia lom. chuvang chuan midang hawihhawm tak biak a, kan phone hmanga midang dawr kan nih chuan mawi takin inbia ila, lampui chang khatah mi an be chhe mai mai ngailo, kan chhungte pawh anlo ni maithei, an țawngkam alo mawilo deuh anih pawhin biak chhiat ngawt pawh hi a dik berlo. Phone biak hawihhawm hi zirin CALL BOY leh CALL GIRL i ni țheuh ang u.

PAN LAI NUN KHA KA NGAI THIN

                                                                                       Matlana

Thingtlangah piangin mawlmang tak leh  a takin naupanlai nun ka hmang a,mahse tute mah awt bikloin hlim tak leh lungawi takin ka thiante nen hun kan hmang liam ve thin a ni. Skul bana hnim chen te,motor lem khalh te,lirteng(cycle wheelrim etc) khalh te,tawlailir,keimahni siamchawp ngei mai chuan te chu ava nuam thin em! Mau hmunah kalin mau bul kan hai a,hockey stick tur mau bul kawm kan zawnga,kan la a,a hmunah kan suih a,rapchungah te kan han rep ro leh a,ball tur raw bul kan la a,kan suih mum a,a ro hnu-ah ball-ah kan hmang ve thung. Raw ball-a inkhelh te kha anuam ve thin ngawt mai. A ro chuan a zang tha sia,hman a nuam thin hle. Hockey kan khel ber a,ngal chara in vuak palh leh ballin a per palh chang chuan na kan ti thin hle.

Sava veh leh thang kam kha kan uar ber pakhat ani bawk. Thing kak tha deuha kan hriat chu harsa mahse kan la hram hram thin;mahni duh ang takin kan han suih a,pawhfan kan han lei a,kan siam zawh meuh chuan ram-a kalpui a chakawm thin hle. Saihlum kan han hrual leh a,hmanhmawh chang chuan nisa-a pho ro nghak hman loin meiah kan chhuangro mai thin. Dai velah sava tlan a tam thin sia, zingah thoin thosi leh vaihmite seh pawh pawisa loin ramah sava changin thingah te,hmun rem lai deuhah te kan thu a,sava han perh thlak chu naupang tan chuana tluka nuam leh hlimawm a awm biklo a sin.Thang kamin kan buai thei hle bawk. Sava,chepa,thehlei kan awk thin a,kan hlim thin ngawt mai.Naupang harh na na chuan mi pawi te pawh kan sawiin mi thei han lawhruk mai te pawh kan ching hle.Mi hauh tepawh kan tawk zeuh zeuh. Kan sual vang ani kher lova.kan harh leh at vangin pawi tawh chang a awm thin a ni.

Naupang mah ni ila chhungkaw tan pawh kan tangkai hma hle a,tui chawi,mau,thing put te,vawk chaw tur lak leh bal den te,eirawngbawl leh feh te kha skul kal karlakah phur takin chhungkaw tan kan ti ve thin a ni. Tunlai angin TV,computer,internet,phone te awm heklo,toys lah kan nei bawk

silo a ,mahni inchhunga in awmtleina tur a vang a,pawnah kan awm tam hle ani.Naupang infiamna hrang hrang te, skul nundan te kan sawi vek senglo.

Engpawhnise tunlai naupangte aiin kan nun chu mawlin rethei zawk mahila, kan naupanlai nun kha alo hausa zawk a,alo nuam zawk a, alo hlimawm zawk mah a ni.

CHAWTLANG NEN SIKUL AH

                                                                                                       Immanuel-a

Panlai nun hi sawi ve awma mawi ka ni em aw tih chu ka inzawt a, aia upa deuh hlir awm mah ula, ka lung aleng e mai kan thaikawi lawk ange thiamlo teh mah ila.

Naupang harh vang leh hlim thei, nuih duh, fiamthu duh ve tak ka ni a, țhianho zingah pawh an nuihpui ve dar dar ka ni țhin. Tu tihdan zir emaw hi chu ka chem kalna a ni ve hle. Thlarau thilpek a ni em chu ka hre law!

Naupang e tilo chuan țhianho zinga hotu nih hi ka thiam vang ani em chu ka hrelo a, min dah hotu vang zawk nge ni hotu chan hi ka chang thei em em a, ka u rualte leh ka rualpuite paqh hian min u en ve chang a tam mai. Fiamthu duh vanga min chhaih nawmnah erawh ka tawng ngai hauh lo.

Awle, naupan lai hi kan hre țheuh anga, a hlimawm in engto em em neilo, chhungte thawhchhuah ringa mahni duh ang ang kan ngen ve hunlai hi chuan kei leh min hmangaihtu Ka Nu chiah hi kan khawsa a, ngen em em ngailoin ka duh duh hi ka ti ve bawrh bawrh țhin. Nuam ka tih em em chu, sikulah kan han kal a, form kawr hma kawrkilh awm lemlova a hma tlang kan suih bawkna phelh har tak a a fip vek khawp a kan suih laite, maian bel lang huau a kan tlan phet hlawk hlawk a, hmeichhia nen a duh tawk a, thlantui dir zawih zawih a kan in um țhinlaite kha.. hmanlai anlo chang ve ta reng mai.

Chawhma kan han bang chiah a, baklengin inlamah kan tlan haw a, tunlai angin chhungten tiiffin min paitir ngai hek suh, a awm tih pawh kan hre ngailo hrim hrim. Thingpui an in țhin tih pawh kan hre ngailo ani a, kan hmuh țhat ve ber te kha chu, bahra awm changa chhum hmin leh Bal chhumte kha a ni mai a, neinung fa deuhte chuan Orange chhang chenghnih man te pawh an ei ve ang. Keini erawh chuan,Baktawng bel a chaw chhum chu kan hawng rawk rawk a, chawtlang lian tawk tak chu la chhuakin hmeh pawh ngai lemlovin vei lama Chi khat țana a awm kha chuan lung a awi hliah hliah mai. Sikul lamah kal leh nghalin chawtlang kan keih hawl hawl mai a, Ar chaw zawngin kan chawmal thlauh changa min han um dawr dawr tawk lah bolo. Veilama chi hum tui dap chu kan han liak zauh zauh a, tunlai KFC hi kan ngai biklova, CHICKEN TANDOORY kan ngai helo, kan hnungah minlo zui duah duah zawk. Sikul kawnga tute sețawk rah țha deuh emaw kan han ru zui bawk a, avan nuam țhin em....

Sikul kan thlenga ipte kan bang hnawp a, serțawk ball petin kan lim leh ta thiak thiak a, a ruh țhatlai kha ke ana duh in kezungpui bawk lai hi ana duh ngei mai. Țhiante nen han inchilh changa ngalchar an inkhawng fuh țhinte kha na ti ve hle mah ila kan han tuai nawk nawk a, a dam veleh mai. A hnuah a lo duh chur țhinte kha kanlo van huaisen țhin tak. Tunlai naupang hian an khel ve ngam angem le?

ENGTIKAH EMAW CHUAN.....

                                                                                                 Zoremi Hmar Zote

"Ka nun hi, chawlhna awm lo natna tuàm hlâwm, pâwnlam nuia sêih fo mah ni se, mittui tla tur awm lo khawpa chhungril țapa rûm țhin, beiseinain a hmai a hup san leh, 'hlimna'-in a nihna hriat fiah a phal sak loh nun thawpik, mâwina êng èn phak loh thim chin a rûm țhin leh, beiseina nung thih san nun a ni ta!" I ti maw...?

NGAITHLA TEH...
Engtikah emaw chuan i nuna chhûm zîng khân kian san chein, zåwr hnêpa nan țhintu che ruah khân bàn hun a la nei ang...

Engtikah emaw chuan mi rualin i la nui ve ang a, chhungril hlìm vanga sêih țhinte chàn kha i chàn a la ni ve dawn....

Engtikah emaw chuan i tân ni a la êng ve ang a, khã nun, thim zînga țapa rûm fo kha i mumang ang mai a la ni ve ang a, khaw êngah ngei i la nui ve ang...

Engtikah emaw chuan i nunin hahchawlhna a la hmu ve ang a, beiseina êng hnuaiah, hahdamna hulhliapa zâl der derin, i hringnun thawnthu lungchhiatthlak zet kha i la mangțha ve ngei ang le...!

Khi'ng zawng zawng nei tur erawh khi chuan maw ka țhian...

I DAM A NGAI!

(Nghak la, thlir la, beisei tlat ang che)

CHHUNGKAW THA NEIH KAN PHU EM?

                                                                                                                      Matlana

Kenneth Chaffin-a chuan,"Chhungkua hi khawvela pawl hlun leh tlo ber tur ani a,chhungkua a hlawhchham chuan khawvela pawl dang zawng zawng hi hlawhchham sa an ni. Hetiang anih avang hian chhungkaw tha din hi khawvela hna pawimawh ber a ni",a ti.

Chhungkaw tha din tur chuan pa tha apawimawh  hmasa ber a,pa tha chuan nu tha a hring ang a, chu chuan naupang tha asiam ang. Mihring chu thalo sa a piang, enkawl that chawp ngai kan ni.

Tunlaia chhungkaw thalo kan tam tak nachhan hi mahni  fate pawh enkawl tha peih lo, awmpuite kuta dah mai mai, chin tawk nei lova duat,an thatna tur kawnga kaihruai lo hrim hrim nu leh pa  kan tam vang a ni. Kan enkawlna rah alo lan.hunah kan harh chauh a,alo tlai tawh si thin a. An nih tur ang ang anlo ni zo tawh. Chutah meuh chuan thenkhatin jail-ah kan dah a,athenin home-ah. Thenkhatin hmelhriat Revival Speaker kan hruaitir thul. Mite hmuhah kan inthup tawk tawk a, kan inthup seng hlei lova. Heng zawng zawng hi tu mawh nge? Nangmahni,keimahni, nu leh pa mawh ani.

Tunlaia an uar,an intihhmuh, tha awm deuh,tha silo chu naupang skul la kal lo Pre School kaltir hi a ni. Tawng leh engkim nuten hmangaih taka zirtir rual lek,nu ngheng renga pangchang taka mahni in luma la tawm mai2 rual, man chawia midang kuta kan dah duh hi KEI CHUAN MAK KA TI. A pawisa neih thlakin,ava thatchhiat thlak em kati kei chu. Fate kan ngainat dan te,kan lawm dan te,kan hmangaih dan te hi alo inchen lo em ani e. Pre School-a an zirtir ang kha in lamah nuin zirtir ve mai ang hmiang! An thian kawm leh an infiamna hmanrua ang tepawh inah chhawp ve mai sela!

Fate hi kan rochan, Pathianin a malsawmna min pek,ngun taka kan enkawl tur an nih hriat thar leh atul hlein ka hria.

A NA ASIN

                                                                                         Rinmawia Hnamte

Laipuitlang leimin avanga ,nun chan ta te bakah, an chhungte zawng zawng tan ka hlan e.)

Ka mu chu ka harh chiang ngei mai, Curent a lo thim vek a, kawlaphe zawr zawr a,  khawpui ari dur dura , Ruah atla nasa in thli te lah chu a ri vuk vuk mai a. Kei lah  Ruah   leh thli hlau chi ka ni bawk nen, ka lu chu lukham hnuai ah thuk ru in, Blanket in ka in      khuh hlun maia, Hlauhna in ka tiril aman a, ka khura, ka thlan lah chu atla nasa em em   mai leh nghal. Engtia rei nge chutia ka awm dawn ka hre lo,ka thaw a chham mai dawn in ka hria a. 

Chutia ka awmlai chuan ka beng bula ka handset chu a lo rum vung vung mai a, ka hlauh a zual in ka thinphu a ti rang a, ka tiril ah min man in hlau leh khur chung in thim tham ah kan dap a, chutah fiah lo ruai a kan en chu ‘Mr Calling’ tih hi ka hmu thei a, Ka thianpa hi Mr(mister) tiin ka save mai a, ani chuan ‘Duat’ tiin min ko mai thin. Ka harh chiang kawk mai a. Chutah ‘Hello’ kan ti chu, thaw ri deuh hrawk hrawk hian ka hria a, a hlauh hian ka hlau ta tulh tulh mai, kan ‘hello’ nawn leh hnu chuan , ‘Duat, mu thei em?’ rawn ti deuh hrawk a, kei chuan ‘Ti nge enge thleng a Mr..enge awmzia’ kan ti a. ‘Duat, uluk tak in ngaithla la, chi ai suh , tun ah hian i duh leh ka aw hi lo record la, kan awmna in a chim a, lei hnuai ah hian ka tang mek ani, engtik ah nge ka lo chhuah ang ka hre lo a, ka phone hi ka khoih rem chang hlauh a, ka lo phone che nih hi’ a rawn ti a, athaw ri leh hawlha, ‘Mr a ni thei lo enge awmzia, ka awih lo’ ka ti a khum ah ka thu chhuak hlawl a, ka khum bula emergency light in chhawp chu kan ti eng a, ka thawm hria chuan ka nu leh pa te pawh an lo lut a thil awmzia min zawt a, mahse chhang thei ka ni lo, ka mittui hi aluang nghal zawih zawih a. Phone pawh chu la kang tur in chakna ka neilo, Ka Pa chuan alo la a, an en a, Ka thianpa ani tih a hre nghal a, ‘hello’ ati a, ahnu chuan loudspeaker a dah chuan Mr a thusawi chu kan ngaithla a, A tawng ri a tang chuan hrehawm a tih hmel em em a, ‘Duat , tun ah hian ka nu leh pa ka chhungte hi engtin nge an awm ka hrelo a, keimah ang bawka, hrehawm tak a an  awmhi ka ring a, pui tur in chet khat pawh ka che sawn thei lo, ka rilru a awm hmasa ber chu nagmah hi I ni a, nachin lawk a ka lo len a, thli thaw vuk vuk hnuai a, vawt ti tak a in in atang ka haw tur in kaia min thlah lai , Mr riak law law maila, ruah in a nan ang che I tihlai te kha mit thla ah a lang asin, khatia ka haw tur I bianga mangtha tih pah mi hmuh hlau taka ka chuks che kha engtik ah nge ka chhunzawm leh ang le traw, (thawk anla leh te te a, ka chhungte mittui pawh atla a, keipoh tah hawm hawm mai ka chak a) Mahse maw, ka haw kha ka chhungte khan minlo la nghak a, chhung inkhawm kan nei a, khangte kha kan chhungkaw in hmuh tawp alo nita, Duat, inneih a, kristian chhungkaw din hun te kha kan sawi nasa, kan chak tawh tiraw, ( ani pawh chu a tah aw tuau tawh a) mahse duat….ka awmna hmun hi a hrehawm em a, heta tang hi chuan kristian chhungkaw dina nang nen ahlim tak kan awmtheih ka rinna hi a awm tawh lo a sin, ka kawng chin hnuailam hi eng tin nge a awmka hre lo a, ka awmbawr chiah hi ka che thei a, mahse hei thawk pawh a har tan tawh sin, duat min hre thei em…I aw vawikhat tal hriat ka van chak em, min hmangaih thu vawikhat tal min han hrilh leh ta che..ka in sum thei tawh lo ka tap chhuak hawm hawm a, ka nu chuan a awmah min kuah chuan, mambawih chhang ta che hei , ti bak chu a sawithei bik lo, ti chuan ka theihna sawm khawm in ‘Mr , ka hmangaih che ka hmangaih ngawih ngawih che chhel takin awm rawh aww….. ka ti chuai raih a, a reh vang vang hnu chuan fiah lo tak hian, Duat ka kal ahun dawn, hei min hruai tu tur an lokal tawh ania, ka nu leh pa pawn min lo huih tawh, anuam dawn tuk, lokal ve ngei ngei rawh aw, ka lo hmuak dawn che nia,ka hmangaih mangt….. thawm hriat tur a awm ta lo, aw chhuah in ka tap a, khang tluk ahun hrehawm kha a awm lo ang, ka pa in hello hello a ti ri chu ka hre ruai ruai a, abak hriat ka nei tawh lo.

Kan harh chu khua alo var tawh a, minlo thut bial laiha ,ka hawi vela mahse ka Mr-a, ka damlo nih khua a ka bula lo awm a,Duat taka min chula, nuisang chung a min lo en thin tu kha a awm tawh lo, ava na tak em..ka hmangaih ka chanta..Lalpa I remruat hi ka tan ava na em. Mr-a chu I hnen ah i hruai tawh a, ngah nge min hruai ve nghal loh ? Ka in nghahna, ka dam chhan , atana rinawmtak leh thiang hlim tak ka awmna, Kristian chhungkaw din tura kan inbuatsaih laia ti mai min lak san mai le..ava na em LALPA….