KA ZUA NUNNEM

Zoremi Hmar Zote

Chûn leh zua țâng țhen mah tuar har ti a! Tuahrem zâi rêl ka duhaisàm! Chûn lunglai nuar thawi damin leh, Duhaisam, chhûngkim dâr ang lèn a lo ni..!

Mahse khuarêl, ka dan rual loh, Tlângtin hrût awmlai hrângin, Ka zuâ rûn riâng a kân lo ve!

Tlâng than riruai a lo kiu a, Rilthang a fan, ka zua sakhming an hril e, Kâwl ang kan vài, thinlai min run mang'e..! Tawnmang chang se, baw-ar pau'vin min thò mai se...!

Rualtin khûm tluangza chhâwn lêng kan chan ve nan, Biahmâng thutin damte'n min hlan, Nun mawi, zia țha hawih tin min fahtu, Zuâpa kan tan i hlu chuang e.

Chhuih bah kawng dik ka bò chang paw'n, Thin țhâwng aw vîn sirah hnâwlin, Ànkâ tui ang dam min hlan hmangaihna nen, Kan vawng reng na'ng e thinlairila'n.

A fam ta maw? Belhlai zua nunnem! A lawi ta maw? Puini kawngkhar mawiah! Min ngailovin kìr zai a rêl lo maw?! Nang ngaih bâng hian kan mawi em ni?!

Zuapa, i thâi riangtê han dâwn la, I ngâi luaithlinûl a thâm vel e, Țah zâi sà-in a àu ruai che! I hnêm dawn lo'm ni? I liam a phal si lo..!

Lungzùr thinnat, lairil hnìmin, Zua nêm nang ngaih a zual leh țhin, Suihlung lawma lungril hlim paw'n, Zuapa ngaih che a bâng chuang lo!

Sûl tam veiin khua rei mahse, I thar bâng lo, thinlairûkah, A mi zuâ khûm kan enchimloh, I sakhming sawi kan bâng lo'ng e..!

Hmangaihtu Lalpa, ka Lal nunnêm, Fam zùn ngai riang min hnêm lang'in, Chutin i hnen kan thlen ve nan, Awmhar ni chhùn min chhiarpui rawh....

(Aizawl) <01062015>