KA INLUAH A HRANG EM NI?

                                                                                                                 Immanuel VL Remsiama
Kum 2006 khan college ka kal ve țan avangin Aizawl veng pakhatah in ka luah ve ran mai a, mahni tawkah college kal inti ve nafam chu ka inchhuang rilru ve hle a, college kal nih ve hrim hrim kha ka inchhuanna piah lamah ka college ngaihsan em em a ka luh vang te pawh a ni mahna le.

Chutia mahni chauha ka awm avang chuan țhiante pawh an lo lenglut ve fo mai a, nuam kan ti thei hle a, chaw eikhawmna ber ah kan hmang hi a ni ringawt mai. Hlim taka ka awmlai chuan kan vengah hian Hmaituama alar hle mai a, engah vakmah ka ngailo a, chemtum hi ka khum hnuaiah ka dah ve ran zel. A hnuah chuan a reh veleh mai a. Țumkhat chu kan țhenawm ti mai ila, ka inluah ațanga hla lo te ah chuan mitthi kan nei a, ka va tlaivar ve a, a tuk zanah chuan tui taka ka muthilh lai hian tukverh darthlalang hi a rawn ri leh keuh keuh țhin a. Ka lu kan kân êt êt a, thawm kan ngaithla chiang a, ka hriat dan chuan Darthlalang kilhna phawi niawm tak hi a ni. Hmaituama chu ka inah hian alo kal ve nge mawni le tiin ka ngaihtuah neuh neuh a. Khum hnuaiah ka chem dah chu dim thei ang berin ka han ban a, ka chawi kang nge kanglo tih hial khawp a dim leh muang chuan ka han la ta zal zal mai a. Thawm chu ka han ngaithla leh a, a reh ta vang vang si a. Ka bengek tlu ri vel mai mai emaw chu tia ka ngaihtuah mek lai chuan, a rawn ri leh ta rêt rêt mai le! Ummm... tunah chuan Darthlalang kilhna zawng zawng chu a phawi kim ta a, Darthlalang lak thlak a, a kalhna hawn chiah a hmabak ta! Chutihlai tak chuan, tukverh bulah chuan lo chang ila, alo lut chu a nghawngah tak ka sat thei dawn a ni. Thawm dim em em in, dingdihlip in ke zungpui chauh ringin ka kalphei ta țham țham mai.... lo lut ta se, a nghawng ah tak sat turin ka in tintuah a, a nghawng sahchhum ngei chu ka tumruh hle mai. Thawm chu a reh tak vang vang avangin Pardah chu ka han hawng thut a, mahse, engmah ka hmulo.. ka hawihai angreng hle mai a, ka nuih a za zawk rilru hle. Mahse, enge niang le? Tih chu ka inzawhna lian tak a ni ta. Ka rilru kawm melh melh chuan khumah chuan ka mu leh ta a. A lo lut a nih chuan ka tho tawhlo anga khumah kalo cho tawp mai ang ka ti rilru ta a.

Chutia ka han mu leh chu thawm chu a rawn awm leh zel si a, mahse chemtum nen kan ni tho a, ka hlaulo tih rilru nen kalo in sang phek nasa mai. Ka lo sat hlum hlauh a nih chuan, tual that pawh ni ila, thiam ka chang dawn hrim hrim a, court ah ka misual thah hian thiamthu a sawi ve thei tawh dawnlo a. Ka hmingțha zawk hlauh thei a, huaisen nih ka hlawh phah zawk daih thei a sin! kalo inngaihtuah tui lutuk avang chuan Misual lo luh tum pawh chu kalo hrechanglo a, ka muhil zui ta a. Zingah chuan darthlalang chu kan enfiah vut vut a, engmah kut hnuhma a awm bawk silo a. Phuțin a inchar phui tlat leh perek inkilh pawh a pangai thlap ala ni si. Nizana ka thawm hriat kha tu thawm nge ni anga, enge niang tih chuan min tibuai ta hle mai. Chhe heile, ka inluah hi a fu dawnlo hle mai, a ranglama inthiar chhuah angai ang tih chuan min ti hlauthawng zawk leh ta. Ka buai ru hle, Inneitute ka hrilh mai dawn em niang? Hrilh ta ila, thil ho deuh a nih chuan kan inti mualpho mai mai ang. Hrilh lo ila,  zana tuar leh chu ka hlau rilru ve deuh tho si. Chulai boruak in min tuamvel lai chu a hahthlak khawp mai, nang ni ta la engtin nge i tih ang? Class ka kal a, ka haw leh chuan, kan țhenawm nau chu alo leng a, zanin khawharin kal i tum em min tia, aw tih bakin ka chhanglo a, ka rilru chu ala insual nasa hle zawk tlat si a ni. Ka chhan tam loh avang chuan a haw veleh mai a. Keipawh chaw eikhamah chuan Khawhar inah chuan ka kal ta a, zai a tui lemlo khawp mai. Ka țhu vel ve mai mai a. Ka ngaihtuahna chu hlauhna in a rawn zêm a, ka inngaihtuah hlau zel bawk nen, ka hlau rilru hle a, kan mitthi hi a thla a hrang a nih dawn hi tih chu khawharin ka awm chhung chuan ka nemnghet ta hmiah mai a ni.
Kan zai reilo riau in ka hria a, ban chu ka hreh hle mai, an ina riah ve nghal mai te chu ka duh rum rum. Mahse, ka haw ta a. Ka in chu ka en a, ka kawngkharah chuan mi tu emaw țhu kûn deuh awm tlat hian ka hmu a, step ah chuan thawm dim thei ang berin ka chhuk ta țham țham a, step 5 vel la awm ațang chuan chak lutuk tak maiin ka tlan a, kan chhir pawp mai a. Țin chhia hi Buara hian anlo khuh chu niin, kan kawmthlangte kawtah chuan a ri thla ta rawk rawk a. Mihring lo ni ta tehreng pawh ni se,  thin tla zawk khawpin ka pet ngei ka ring.

Hlauh tawhsa nak laia khatiang han tawn lehzel kha chu aaa.... naupang hoin min tihțhaih nan an lo hmang vel mai mai a niang ka tih rilruk mek lai chuan thawm chu ka hre leh ta. Chhehei le.... zanin chu ka nun khua avan chau em.! Hlau chung chunga hmachhawn angai dawn tlat mai, engtin tak ti ang maw le!! Chem ka la a, kawngka kan hawng thut mai a, Zawhte hi rang lutukin inhnuai lamah chuan a tlan lut ka hmu hman a, light on nghalin a nihna chu ka chian ta a. Bangchhak daidep/innghak in rannung a veh lek chu a lo ni a.... thinrim țhumin mut zai ka rel ta aaa....