TUIFINRIAT ANG NUN NEI ILA.

                                                                                                                        Matlana
China mi fing Lao Tse chuan,"Tlang sang lui tui zawng zawngin tuifinriat an chawm theihna chhan chu tuifinriat hi hniam taka a luan vang ani"alo ti a.A dik ngawt mai.
Hniam taka aluan avangin amahah lui zawng zawng an luanglut a,amaha luanglut zawng zawng alo dawl zoa, alo lem zoa, atawk tawh tih reng a neilo. Hniam berah luang mahse alian bera, a chungnung bera,amah ter phak reng an awmlo.

Chutiang bawkin mifing, mite chunga leng thei te hi mi inphah hniam,mi hnuaia kun peih,mi hnunga kal thin,mi zai ngaia nung thiam te anni fo. An tlawmna leh an inphahhniamna chuan a chawisanga,a tawpah mi chungah a lentir zawk hlauh thin. Mite chunga an len pawhin miten rit an ti lova,an hmaa an kal lahin hnawk anti hek lo. Chuvangin nangpawh hmasak chuh lo la,mi chunga chuan tum ngawt suh. Nang chu ahnuai zawk zelah,a hnung zawk zelah awm la,mite hmasaktir thin ang che. Tichuan nakinah a chungah anla awmtir ang che'nga,ahma-ah anla kaltir ang che.

Hruaitu nih i duh em? Hotu nih i duh tiraw? Nghak phawt teh,hmanhmawh suh. Hniam tak atanga i tan ve  phawt a ngai. Pawl hruaitu i nih duh chuan member rinawm tak ni ve phawt rawh. Hruaitu tha ni tur chuan hruai nuam tak i nih hmasak zet a ngai ve hrim hrim. Fa tha tak i nih loh chuan pa tha;nu tha nih ahar thin ang hi a ni. Chutiang zelin zirtu tha tak tan lo chuan zirtirtu tha nih ngawt dan a awm lo.

A hun tak zelah i chapona dahtha la, inngaihtlawmna nen i nun hmang la; mi ten nangmahah chawlh tumin luanluh an rawn châk ang. Nangmaha luanglut an tam poh leh i nun alo hausa mai dawn alo ni. Tuifinriat ang nun hi han nei thei hlawm theuh mai ila aw!! Khawvel hi ava nuam dawn em!!!